Okwi atupwa jukwaani Austria

KIUNGO nyota wa Simba, Emmanuel Okwi, jana usiku alitarajiwa kuwa miongoni mwa wachezaji wanaofanya majaribio katika kikosi cha FC Red Bull Salzburg watakaokaa jukwaani kuishuhudia timu yao ikicheza mechi muhimu.

Klabu hiyo ilitarajiwa kushuka dimbani dhidi ya F91 Dudelange kutoka Luxembourg, katika mechi muhimu ya kuwania kucheza Ligi ya Mabingwa Ulaya.

FC Red Bull Salzburg ndiyo mabingwa wa Austria na Okwi ameshaanza majaribio, kwa mujibu wa taarifa katika mtandao wa en.scometix.com, klabu hiyo ilitoa mwaliko maalum kwa timu za vijana na wachezaji wageni (kina Okwi) kuona mechi hiyo.

Uwanja wake wa nyumbani wa Red Bull Arena una uwezo wa kubeba watazamaji 30,188 na mchezo huo ulikuwa ni muhimu kwao kushinda ili kupata nafasi ya kushiriki Ligi ya Mabingwa Ulaya.

Kuhusiana na majaribio, inaelezwa Okwi ni kati ya wachezaji wanaofanya vizuri na mafanikio ya mmoja wa wachezaji nyota wa timu hiyo, Ibrahim Sekagya, ambaye ni raia wa Uganda, yanaweza kuwa msaada kwake.

Kutokana na kazi nzuri ambayo amekuwa akiifanya Sekagya ambaye amewahi kukabidhiwa unahodha wa timu hiyo, ni nafasi nzuri kwa Okwi kupata ulaji.

Iwapo hatafanya vizuri katika majaribio hayo, Okwi ana nafasi ya kwenda kufanya majaribio zaidi nchini Italia ambako hata hivyo ameonekana kupahofia kutokana na kiwango chao kuwa juu zaidi kisoka.

- Mwandishi wa GPL