Minziro: Berko aligoma kurudi uwanjani

KOCHA Msaidizi wa Yanga, Fredy Felix Minziro, amesema kipa wa timu hiyo, Yaw Berko, aligoma kurejea uwanjani katika mchezo dhidi ya Yanga, kutokana na kudai hayupo fiti kimchezo.

Katika mchezo huo uliopigwa kwenye Uwanja wa Taifa jijini Dar es Salaam, Yanga ilipokea kipigo cha mabao 5-0 dhidi ya Simba.

Berko alianza kudaka katika kipindi cha kwanza akafungwa bao moja lakini alijitoa katika kipindi cha pili na nafasi yake kuchukuliwa na Said Mohammed aliyefungwa manne.

“Kenneth Asamoah alinifuata na kunijulisha kuwa Berko hatarudi uwanjani, nami nikamfuata na kumuuliza juu ya uamuzi huo. Alishikilia maamuzi hayo, jambo ambalo lilinilazimu kufanya mabadiliko kwa kumuingiza kipa namba tatu.

“Nilifanya hivyo kwa kuwa kipa namba mbili, Shaaban Kado hakuwepo kwenye hesabu ya waliotakiwa kucheza mchezo huo.

“Wengi wamekuwa wakilalamika juu ya mabadiliko hayo lakini wanapaswa kuelewa kuwa huo ndiyo ukweli halisi na haiwezekani kocha akafanya mabadiliko yoyote uwanjani bila kuwa na sababu ya msingi,” alisema Minziro.

Na Khatimu Naheka