.:.

IKIWA ni takribani wiki mbili tangu mwanamuziki Naseeb Abdul Jumaa ‘Diamond’ alipomvisha pete ya uchumba ‘shugamami’ wake Wema Isaac Sepetu, visa vimeanza ambapo habari zilizoenea kitaani zinadai kuwa ndoa ya wawili hao imebaki stori kwani kuna uwezekano isiwepo, Risasi Mchanganyiko lina maelezo kamili.

Akizungumza ‘exclusively’ na vuvuzela wetu juzikati jijini Dar es Salaam akiomba ushauri afanye nini ili kunusuru uchumba wake huku akitoa sauti iliyoambata na kwikwi kama anayeomboleza msiba, Wema alifunguka kuwa kinachofanya achanganyikiwe na kuwa katika wakati mgumu ni kutokana na mama mzazi wa Diamond, Sandra Sammy ambaye anahisi anamchukia.

“Nilipoanza mapenzi na Diamond nilikuwa naelewana sana na mama yake, lakini sijui nini kimetokea kwani naona kama amebadilika.

UVUMILIVU WATAKA KUMSHINDA WEMA

“Binafsi naona kama uvumilivu unataka kunishinda. Yaani hadi hapa nimeshakata tamaa ya ndoa kutokana na maisha kutawaliwa na ‘timbwilitimbwili’ za hapa na pale,” alisema Wema.

Mnyange huyo alisema hivi karibuni waliitwa Zanzibar na baba yake mzazi kwa ajili ya utambulisho rasmi na kuweka mipango ya ndoa sawa lakini kwa jinsi anavyoona hakuna kitu kama hicho kwani kila akimpigia simu mchumba wake huyo haipokelewi na hata akituma ujumbe mfupi ‘sms’ hazijibiwi.

WEMA MTUMWA WA MAPENZI?

“Nahisi nimekuwa mtumwa wa mapenzi, utadhani nililetwa duniani kuteswa na mapenzi.

“Hebu fikiria leo ni siku ya nne Diamond hapokei simu wala hajibu sms, najua sina la kufanya, nimeamua kumwachia Mungu kwa sababu mwenzangu anamsikiliza zaidi mama yake.

“Diamond anajua fika kuwa mama mkwe wangu ananichukia na kila siku ananichachamalia niachane na mwanaye, nimeamua kunyanyua mikono juu na kumshukuru muumba kwa hapa tulipofikia kwani sina jinsi.

“Najua jamii itaniona mkorofi na sistahili kuwa mke wa mtu, lakini ukweli mimi si mkorofi na nampenda Diamond kwa dhati,” alisema.

ETI PANDE ZOTE MBILI HAZITAKI NDOA

Uchunguzi uliofanywa na gazeti hili umebaini kuwa wakwe wa pande zote mbili hawataki kuona ndoa hiyo inafungwa, wanawachukulia wapenzi hao wanafanya mambo yao kujifurahisha tu na kwamba hawapo ‘siriasi’.

DIAMOND NA MAJIBU YA MKATO

Baada ya kusikia upande wa Wema, gazeti hili lilimtafuta Diamond ili kupata mzani wa habari hiyo ambapo staa huyo wa ngoma ya Moyo Wangu alitoa majibu ya mkato.

Risasi Mchanganyiko: Diamond harusi yako na Wema ni lini?

Diamond: Siku yoyote Mungu akipanga.

Risasi Mchanganyiko: Lakini kabla Mungu hajapanga, wewe unategemea itakuwa lini?

Diamond: Unajua mimi namuamini sana Mungu hivyo yeye ndiye anayejua.

Risasi Mchanganyiko: Kuna taarifa kuwa mama yako hampendi Wema, je, ni kweli?

Diamond: Sijui chochote.

Risasi Mchanganyiko: Pia inadaiwa kuwa hata mama yake Wema hataki umuoe Wema, je, hili likoje?

Diamond: Sijui chochote mimi nasikia tu maneno ya mtaani.

Risasi Mchanganyiko: Inadaiwa kuwa leo ni siku ya nne hupokei simu wala kujibu sms za Wema, je ni kweli?

Diamond: Siyo kweli.

Risasi Mchanganyiko: Nimemaliza kuzungumza na Wema sasa hivi (Jumatatu saa 4:00 asubuhi) anasema una siku ya nne hupokei simu yake wala kujibu meseji zake?

Diamond: Mimi namuamini sana Mungu ndiyo maana naswali sana.

Risasi Mchanganyiko: Hilo la kuswali sana limetokea wapi? Naomba ujibu swali uliloulizwa!

Diamond: Unajua mimi nafanya kazi sana, hivi sasa natokea Ifakara (Morogoro) kufanya shoo.

Risasi Mchanganyiko: Kwa hiyo kufanya kwako kazi nyingi ndiyo kunakokufanya usiwasiliane na mchumba wako?

Diamond: Unajua mimi niko ‘bize’ sana.

Hali hii iliendelea hadi mwisho ambapo Diamond hakuwa tayari kuzungumzia ishu hiyo kiundani.

Na Shakoor Jongo, Risasi Mchanganyiko