.:.

MSHAMBULIAJI wa Simba, Felix Mumba Sunzu, yupo katika mikakati ya kumshawishi mdogo wake, Stopila Sunzu, ili aweze kumwaga wino katika fomu za wekundu hao.

Stopila ndiye alimdhibiti mshambuliaji Demba Ba baada ya kumkaba ‘ng’adu kwa ng’adu’ kwenye mechi ya ufunguzi ya Kombe la Mataifa Afrika kati ya Zambia na Senegal.

Kawaida Stopila hucheza kama kiungo wa ulinzi kwenye klabu yake ya TP Mazembe lakini siku hiyo Kocha, Hervé Renard alimrudisha namba nne ili apambane na Demba Ba anayekipiga Newcastle ya England. Mwisho Zambia ilishinda kwa mabao 2-1.
Akizungumza na Championi Jumatano, Sunzu alisema amefurahishwa na kiwango alichokionyesha mdogo wake katika fainali hizo na angependa kuona anajumuika naye katika klabu yake ya Simba ingawa anaamini haitakuwa rahisi kutokana na fedha nyingi anazolipwa na TP Mazembe.

“Kuhusu kuja Simba, nitamshawishi lakini sidhani kama itakuwa rahisi kwa sababu kule Mazembe analipwa fedha nyingi sana,” alisema Sunzu na kuongeza:
“Naona jinsi hapa Simba tunavyopata matatizo ya safu ya ulinzi, lakini mimi siyo kiongozi wa timu na endapo wataona kuna haja ya kumsajili Stopila, nitawasaidia kumshawishi. Muhimu ni maslahi mazuri maana mpira ndiyo kazi yake.”

Na Khatimu Naheka